Dadansoddwr Systemau
Bydd deiliad y swydd yn aelod allweddol o'r Tîm Datrysiadau TG, gan gyfrannu at ddarparu gwasanaeth TG effeithlon o safon uchel sy'n canolbwyntio ar y defnyddiwr ar gyfer y staff a'r myfyrwyr sy'n gysylltiedig â gwasanaethau corfforaethol, gweithrediadau gweinyddol, ymchwil academaidd a gweithgareddau dysgu ac addysgu'r Brifysgol.
Mae'r swydd hon yn canolbwyntio ar nodi a diffinio'r gofynion ar gyfer systemau sy'n gwella profiad y myfyrwyr a'r staff. Byddwch yn gweithio ar y cyd â thîm amlddisgyblaethol sy'n cynllunio, yn dadansoddi ac yn datblygu profiad defnyddwyr. Byddwch yn helpu i gyflwyno datrysiadau TG arloesol a dibynadwy sy'n cyd-fynd ag amcanion strategol y Brifysgol.
Byddwch yn defnyddio methodolegau, offer a safonau dadansoddi sefydledig i nodi anghenion y busnes yn effeithiol a'u troi'n ofynion clir y gellir gweithredu arnynt ar gyfer systemau. Mae hyn yn cynnwys deall newidiadau dymunol, nodi problemau a chynnig datrysiadau sy'n cefnogi datblygu'n barhaus.
Byddwch hefyd yn cyfrannu at ddatblygu achosion busnes drwy gyfleu'r manteision posibl, gwerthuso datrysiadau posibl a nodi'r risgiau cysylltiedig. Bydd eich gwaith yn helpu i sicrhau bod systemau a phrosesau newydd neu well yn sicrhau gwerth mesuradwy ac yn cefnogi cenhadaeth y Brifysgol.
Swydd amser llawn a phenagored yw hon.
Cyflog: £41,064 hyd at £46,049 y flwyddyn (Gradd 6)
Dyddiad hysbysebu: Dydd Gwener, 16 Ionawr 2026
Dyddiad cau: Dydd Gwener, 13 Chwefror 2026
Mae Prifysgol Caerdydd wedi ymrwymo i gefnogi a hyrwyddo cydraddoldeb ac amrywiaeth a chreu amgylchedd gwaith cynhwysol. Rydym o'r farn bod modd gwneud hyn drwy ddenu, datblygu a chadw ystod amrywiol o bobl o lawer o gefndiroedd gwahanol sydd â'r uchelgais i greu prifysgol sy'n ceisio cyflawni ei rhwymedigaethau cymdeithasol, diwylliannol ac economaidd i Gaerdydd, Cymru a'r byd. Er mwyn helpu ein cyflogeion i sicrhau cydbwysedd rhwng eu gwaith a'u bywyd personol, byddwn hefyd yn ystyried cynigion i weithio'n hyblyg neu rannu'r swydd.
Caniateir i geisiadau gael eu cyflwyno yn Gymraeg, ac ni fydd cais a gyflwynir yn y Gymraeg yn cael ei drin yn llai ffafriol na chais a gyflwynir yn Saesneg.
Bydd gofyn i ddeiliad y swydd wneud y canlynol:
* Bod yn gyfrifol am ddadansoddi anghenion defnyddwyr a'r sefydliad, gan gynllunio a gwella systemau a phrosesau digidol a sicrhau bod datrysiadau TG effeithiol yn cael eu cyflwyno sy'n cefnogi'r myfyrwyr, y staff academaidd a'r Gwasanaethau Proffesiynol
* Cysylltu ag uwch-gleientiaid a'r staff TG yn ôl yr angen, gan gynnal ymchwiliadau a mynd ati wedi hynny i bennu gofynion a pharatoi astudiaethau dichonoldeb – byddwch yn sicrhau bod barn pawb yn cael eu hystyried, eu gwirio a'u dilysu yn y gymuned o randdeiliaid ac yn sicrhau eich bod yn blaenoriaethu'n briodol i fodloni amcanion y busnes
* Helpu timau cydweithredol o gwsmeriaid i ymchwilio i swyddogaethau busnes, prosesau, llifoedd gwybodaeth a strwythurau data a mynd ati i'w dogfennu, a hynny gan ddefnyddio gwahanol dechnegau sy'n drefnus ac yn gyson
* Cynllunio, trefnu a hwyluso cyfarfodydd a gweithdai gyda chleientiaid/staff sy'n ddefnyddwyr yn ystod y camau ymchwilio a thrwy gydol y gwaith datblygu dilynol, gan gyflwyno materion a datrysiadau ar lafar ac yn ysgrifenedig a defnyddio creadigrwydd i greu datrysiadau amrywiol ar gyfer problemau cymhleth
* Paratoi a chyflwyno negeseuon ar lafar ac yn ysgrifenedig sy'n cyfleu gwybodaeth gysyniadol a thechnegol gymhleth i randdeiliaid (y gall eu cefndir a'u dealltwriaeth o'r mater amrywio), gan fonitro a mesur eu heffeithiolrwydd
* Diffinio dulliau o ymchwilio a dadansoddi, a hynny'n seiliedig ar arfer gorau a'r safonau a nodwyd
* Helpu i ddatblygu manyleb fanwl a modelu datrysiadau a argymhellir, gan ddefnyddio safonau, dulliau ac offer dadansoddi mewn ffordd ddeallus ac effeithiol, a chreu dogfennau o safon uchel yn gyson sy'n dechnegol ac yn ddisgrifiadol o ran eu natur
* Cynnal lefel o ymwybyddiaeth dechnegol sy'n ddigonol i ddadansoddi, modelu a dosbarthu dewisiadau amgen yn ôl dichonoldeb technegol a nodweddion anweithredol
* Defnyddio craffter busnes, sgiliau technegol a phrofiad yn y Brifysgol i asesu a chynghori ar ymarferoldeb dewisiadau amgen, gan sicrhau bod y cyfyngiadau technegol yn cyd-fynd â gofynion gweithredol
* Dilyn safonau dylunio priodol, gan gydweithio'n agos â'r Pensaer Datrysiadau Technegol ac uwch-reolwyr yn ôl yr angen ac ystyried pensaernïaeth menter a phensaernïaeth datrysiadau
* Meithrin a chynnal perthynas effeithiol â rhanddeiliaid
* Gweithio mewn timau matrics a chwarae rhan lawn yn y gwaith o weithredu datrysiadau ar ran y Brifysgol
* Sicrhau bod yr holl dasgau a gweithdrefnau'n cael eu cyflawni'n effeithiol ac yn effeithlon yn unol â lefelau gwasanaeth y cytunwyd arnynt neu ofynion penodol Cytundeb Lefel Gwasanaeth neu Gytundeb Lefel Weithredol
* Arwain neu gymryd rhan mewn prosiectau fel y bo'n briodol, gan reoli timau prosiect, cynllunio, trefnu a dirprwyo gwaith, monitro cynnydd ac ymyrryd yn ôl yr angen; Cyflawni dyletswyddau eraill o bryd i'w gilydd nad ydynt wedi'u nodi uchod ond sy'n cyd-fynd â gofynion y swydd
* Sicrhau cydymffurfiaeth â gofynion cyfreithiol a rheoliadol o ran cydraddoldeb ac amrywiaeth, diogelu data, hawlfraint a thrwyddedu, diogelwch a chyllid, gan gynnwys polisïau, gweithdrefnau a chodau eraill y Brifysgol fel y bo'n briodol
* Cymryd gofal rhesymol am eich iechyd a'ch diogelwch eich hun, gan gynnwys iechyd a diogelwch pobl eraill y gall yr hyn y byddwch yn ei wneud neu'n methu â'i wneud yn y gwaith effeithio arnynt, yn unol â Deddf Iechyd a Diogelwch yn y Gwaith etc 1974, cyfarwyddebau'r CE a pholisïau a gweithdrefnau'r Brifysgol ar iechyd, diogelwch a'r amgylchedd, yn ogystal â chydweithio â'r Brifysgol, sef y cyflogwr, i gyflawni unrhyw ddyletswyddau cyfreithiol sydd ganddi
Cyflawni dyletswyddau eraill o bryd i'w gilydd nad ydynt wedi'u nodi uchod ond sy'n cyd-fynd â gofynion y swydd – ymhlith y dyletswyddau hyn fydd rhai sy'n gysylltiedig â swydd uwch at ddibenion datblygu neu swydd iau at ddibenion bodloni gofynion gweithredol
Meini Prawf Hanfodol
1. Sgiliau rhyngbersonol a sgiliau cyfathrebu rhagorol, yn ysgrifenedig ac ar lafar
2. Sgiliau trefnu da, ynghyd â'r gallu i weithio'n hyblyg er mwyn blaenoriaethu'n llwyddiannus o dan bwysau
3. Dealltwriaeth a phrofiad amlwg o dechnegau dadansoddi, datrys a chyflawni at ddibenion rheoli problemau, gwallau a gwybodaeth
4. Dealltwriaeth a phrofiad amlwg o ddefnyddio technegau dadansoddi a chasglu gwybodaeth er mwyn dogfennu datrysiadau TG cymhleth mewn fframwaith rhesymegol a chlir y mae modd i eraill ei ddeall yn rhwydd
5. Sgiliau rheoli perthynas ardderchog a chadarn, ynghyd â phrofiad o reoli gofynion rhanddeiliaid ar bob lefel
6. Dealltwriaeth a phrofiad amlwg o bennu gofynion mewn ffordd gynhwysfawr ar gyfer rhaglenni newid busnes llwyddiannus
7. Profiad o ddadansoddi a dylunio systemau mewn sefydliad mawr a chymhleth, yn ddelfrydol yn y sector addysg uwch
8. Hanes profedig o weithio gyda rhanddeiliaid academaidd a phroffesiynol i gasglu, dadansoddi a dogfennu gofynion busnes
9. Profiad o gefnogi neu weithredu systemau menter a ddefnyddir yn aml mewn prifysgolion (e.e. systemau cofnodion myfyrwyr, cyllid ac adnoddau dynol, systemau amserlennu a systemau rheoli ymchwil)
10. Profiad o lunio dogfennau clir a chynhwysfawr, gan gynnwys manylebau swyddogaethol, mapiau prosesau a chanllawiau i ddefnyddwyr
Meini Prawf Dymunol
1. Addysg ar lefel gradd ym maes technoleg a/neu reoli busnes, neu unigolyn cymwys oherwydd profiad
2. Profiad uniongyrchol o weithio ym maes TG mewn prifysgol a/neu brofiad o weithio mewn sefydliadau eraill yn y sector cyhoeddus – yn ddelfrydol, bydd gennych brofiad o weithio yn y sector preifat
3. Cymhwyster rheoli ITIL, neu gymhwyster tebyg
4. Y gallu i siarad Cymraeg, neu barodrwydd i ddysgu'r iaith